वैदिक आश्रम व्यवस्था

    मी सध्या मेलबर्न, ऑस्ट्रेलियात आहे. माझे मत कदाचित चूक असू शकेल. पण माझ्या पाहण्यात असे आले आहे की, इथे लोक सेवानिवृत्त होत नसावेत. अगदी सत्तर वर्षांपासून पार अगदी ऐंशी -पंच्याऐंशी पर्यंत ची माणसे शिकतही आहेत आणि शिकवतही आहेत !! अर्थात मी हे शैक्षणिक क्षेत्राबद्दल बोलत आहे बाकी क्षेत्रांची मला माहिती नाही.

     या गोष्टीचे आपल्याकडे खूप कौतुक आहे पण कदाचित वानप्रस्थाश्रमात जगण्याच्या प्रयत्नात असणाऱ्या मला हे कुठेतरी खटकते. (अर्थात मला विचारतेय कोण हा मुद्दा वेगळा !!)

    कमी लोकसंख्या हे एक महत्वाचे कारण असू शकेल कां?? पण या गोष्टींचा तरुण पिढीला मिळणाऱ्या संधींवरती नक्कीच परिणाम होत असणारच!! त्यामुळेच सरकारी अनुदानावर जगणारी (भरकटलेली?) तरुण पिढी वाढत असावी का? खरेतर इथे वयस्कर लोकांची सरकार उत्तम काळजी घेते. (त्यांनीच आयुष्यभर भरलेल्या टॅक्सच्या पैशातून ही का असेना) असेही वाचनात आले आहे. तरीही.....

    एवढा अभ्यास माझा नक्कीच नाही. वरवर दिसते तसे नसूही शकते. पण प्रकर्षाने हजारो वर्षांपासून चार आश्रमांचे महत्व जाणणारी वैदिक भारतीय संस्कृती फारच प्रार्थनीय वाटली. 🙏🙏

    भारतात बहुतांश क्षेत्रात सर्वसामान्यपणे माणसे साठ ते पासष्ट दरम्यान सेवानिवृत्त होतात. पुढील पिढीला संधी मिळण्याच्या दृष्टीने ही अती उत्तम व्यवस्था आहे.

     राजकारणा बद्दल न बोलणेच उत्तम पण माननीय मोदीजींचे त्या ही दिशेने प्रयत्न सुरू आहेतच.

    आपल्याकडील एक फार मोठे व्यक्तीमत्व, आदरणीय मिल्कमॅन डाॅ वर्गीस कुरीयन, यांच्याबद्दल एक गोष्ट वाचनात आली होती. (खरी की खोटी ??)

    एका ठराविक कालावधीनंतर ही ते आपले पद सोडण्यास सहजी तयार नव्हते, इत्यादी, इत्यादी....

   त्यामुळे एक गोष्ट लक्षात येते, योग्य मान मिळत असतानाच कुठलेही पद मग ते घरातील असो वा ऑफिसातील सोडणेच योग्य !!! योग्य तेथे योग्य तेवढेच मार्गदर्शन जरूर करावे, अर्थात ते स्वत:च्या फायद्यासाठी नक्कीच नसावे.

   स्वतःचा मान स्वतःच राखावा, हळूहळू पदाचा त्याग करावाच लागणार हे सत्य स्विकारणे केव्हाही उत्तम.  स्वतःसाठी आणि पुढच्या पिढ्यांसाठी ही !!!

   भारतीय वैदिक आश्रम व्यवस्थापनाचे  सर्व थरांवर आचरण होणे ही काळाची तसेच स्व उन्नतीची गरज असेल. 🙏🙏

वीणा कुलकर्णी 🙏